Dagurinn hófst með miklum látum í sjúkraflugi í dag. kl: 07:30 var farið í F1 (hæsta viðbragðsstig) sjúkraflug til Vopnafjarðar og sjúklingur fluttur til Reykavíkur.

Þar var síðan tekinn um borð sjúklingur sem var fluttur til Akureyrar. Þá biðu tveir sjúklingar eftir flutningi til Reykjavíkur frá Akureyri og var það tekið í beinu framhaldi. Þegar til Reykjavíkur var komið beið sjúklingur eftir flugi þaðan og til Vestmannaeyja. Og í þessum skrifuðu orðum stendur yfir 5. sjúkraflug dagsins með sjúkling frá Akureyri til Reykjavíkur.

22% aukning er á fjölda sjúkrafluga það sem af er árinu en farin hafa verið 185 sjúkraflug með 205 sjúklinga. En einnig er 30 % aukning í fjölda sjúklinga fluttum í sjúkraflugi. Töluverð aukning er á sjúkraflugi þar sem tveir sjúklingar eru fluttir í sömu ferð.

Þetta er fjórtánda starfsár Slökkviliðs Akureyrar í sjúkraflugi og hefur verið aukning ár frá ári að undanskildu árinu 2009. Með sama áframhaldi stefnir í enn eitt metárið í sjúkraflugi en nýlega bættust Vestmannaeyjar við í þjónustu sjúkraflugs frá Akureyri. Sjúkraflugið er samstarfsverkefni Slökkviliðs Akureyrar, Mýflugs og FSA.

Þorbjörn Haraldsson

Slökkviliðsstjóri.