Logi, Glóð og Brennu Vargur

Slökkviliðsmenn gefa út bók um Loga, Glóð og Brennu-Varg

 

 

Landssamband slökkviliðs- og sjúkraflutningamanna (LSS) hefur gefið út myndskreytta bók um slökkviálfana Loga og Glóð og illvirkjann Brennu-Varg. Slökkviliðsmenn munu færa átta ára börnum um allt land bókina að gjöf í Eldvarnaátakinu sem stendur yfir 20.-27. nóvember en þá heimsækja slökkviliðsmenn alla grunnskóla landsins.
Eignarhaldsfélagið Brunabótafélag Íslands er einn helsti styrktaraðili Eldvarnaátaksins.

Bókin ber heitið Brennu-Vargur og er spennusaga. Logi og Glóð koma óvænt fram á sjónarsviðið þegar heimili þeirra eyðist í eldi. Sigfinnur slökkviliðsstjóri tekur þau upp á arma sína og býður þeim að búa í slökkvistöðinni í Bænum, þar sem sagan gerist. Systkinin gerast þá aðstoðarmenn slökkviliðsins enda eru þau búin þeim hæfileika að geta vaðið eld og brennistein eins og ekkert sé. Í ljós kemur að Brennu-Vargur gengur laus í Bænum. Hann er fjarskyldur ættingi Loga og Glóðar og hefur ekkert gott í hyggju. Þegar Brennu-Vargur lætur til skarar skríða á ný reynir mjög á snarræði og hugrekki Loga og Glóðar.

Höfundarnir, Garðar H. Guðjónsson, Halla Sólveig Þorgeirsdóttir og Þrúður Óskarsdóttir, gerðu bókina að beiðni LSS. Vonir LSS standa til þess að börnin og foreldrar þeirra hafi gaman af sögunni um Loga, Glóð og Brennu-Varg. En hún er einnig full af fróðleikskornum um eldvarnir sem börnin geta notað til þess að leysa Eldvarnagetraunina sem er að finna aftast í bókinni. Þeir sem skila inn réttum lausnum geta fengið veglega vinninga sem afhentir verða á 112-daginn, 11. febrúar.