Jafnréttisáætlun Slökkviliðs Akureyrar 2005 (er í endurskoðun núna 2012)
Jafnréttisáætlun þessi er gerð í samræmi við ákvæði laga um jafna stöðu og jafnan rétt kvenna og karla nr. 96/2000 og Jafnréttisstefnu Akureyrarbæjar 2004-2007.
Laus störf
Einungis ein kona starfar hjá Slökkviliði Akureyrar en fjöldi karla er 29.
Við nýráðningar verður leitast við að jafna kynjahlutfallið.
Hvernig: Í starfsauglýsingum verður vitnað til jafnréttisáætlunar slökkviliðsins og jafnréttisstefnu Akureyrarbæjar.
Hver: Slökkviliðsstjóri.
Hvenær: Þegar við á.
Hvernig: Við ráðningar verður unnið í samræmi við verklagsreglur Akureyrarbæjar um ráðningar m.t.t. kynjasjónarmiða.
Hver: Slökkviliðsstjóri.
Hvenær: Þegar við á.
Starfsþjálfun og endurmenntun
Konum og körlum sem starfa hjá slökkviliðinu skal til jafns standa til boða starfsþjálfun og endurmenntun.
Hvernig: Starfsþjálfun í slökkviliði og sjúkraflutningum er reglubundinn þáttur í starfi hjá Slökkviliði Akureyrar sem allir starfsmenn taka þátt í. Menntun er skv. reglugerð nr. 792/2001 BR 1 um menntun atvinnu slökkviliðsmanna og reglugerð 504 frá 1986 um menntun, réttindi og skyldur sjúkraflutningamanna.
Hver: Slökkviliðsstjóri.
Hvenær: Skv. námskrá.
Laun
Nauðsynlegt er að fylgjast með launum starfsmanna út frá kynjasjónarmiði og vinna að því að jafna laun kynjanna komi launamunur í ljós.
Hvernig: Starfsfólk Slökkviliðs Akureyrar tekur laun skv. kjarasamningum Launanefndar sveitarfélaga og Landssambands slökkviliðs- og sjúkraflutningamanna. Raðað er í launaflokka eftir menntunarstigi/starfsaldri og lífaldri.
Ákveðnar vinnureglur gilda um yfirvinnu starfsfólks og er virkt og gegnsætt eftirlit með því hverjum er boðin yfirvinna og hversu oft. Yfirvinna er skráð af varðstjórum vakta í „tímabók" sem jafnar yfirvinnu í ársmeðaltali. „Tímabókin" er öllum starfsmönnum aðgengileg.
Hver: Slökkviliðsstjóri.:
Hvenær: Upplýsingar um launaröðun og unna yfirvinnu liggja ávallt fyrir.
Samræming starfs og einkalífs
Hjá slökkviliðinu eru langflestir starfsmenn í vaktavinnu sem hefur kosti og galla gagnvart einkalífi, mismunandi eftir aldri og fjölskylduhögum.
Reynt er að koma til móts við starfsmenn á vöktum um sveigjanleika í störfum þar sem kostur er t.d. eru að opnast möguleikar á dagvinnustörfum sem reynst getur góður kostur fyrir þá sem eru að nálgast starfslok en einnig þá sem t.d. vegna fjölskylduaðstæðna gætu þurft á því að halda tímabundið.
Hvernig: Hafinn er undirbúningur um að fjölga starfsmöguleikum utan vakta.
Hver: Slökkviliðsstjóri.
Hvenær: Á árunum 2005 og 2006.
Kynferðisleg áreitni og einelti
Gerðar hafa verið leiðbeiningar fyrir bæjarkerfið um viðbrögð við kynferðislegri áreitni og einelti á vinnustöðum. Allt starfsfólk slökkviliðsins þarf að vera meðvitað um ábyrgð og færar leiðir ef upp koma tilvik sem varða kynferðislega áreitni eða einelti.
Hvernig: Haldnir verða kynningarfundir reglulega og nýju starfsfólki gerð grein fyrir þeim reglum sem gilda.
Hver: Slökkviliðsstjóri.
Hvenær: A.m.k. einu sinni á ári.
Endurskoðun:
Endurskoða skal jafnréttisáætlun þessa árlega og setja nýjar aðgerðir í samræmi við þær breytingar sem verða milli ára.