Valmynd
Mynd augnabliksins
Gamli og nýi tíminn á 112 deginum.
Heimsóknir
Í dag: 1034
Samtals: 2777633
Samtals: 2777633
Leit
Könnun
Póstlistaskráning
Menntun slökkviliðs- og sjúkraflutningamanna
Gerðar eru miklar kröfur til hæfni og þjálfunar þeirra sem starfa á útkallssviði Slökkviliðs Akureyrar. Það kallar á mikla menntun og þjálfun sem er í stöðugri endurskoðun. Starfsmenn þurfa meðal annars að standast strangar kröfur um líkamsþjálfun og gangast reglulega undir þrekpróf. Grunnmenntun til að geta starfað sem slökkviliðsmaður er iðnmenntun eða sambærileg menntun, s.s. stúdentspróf.
Í reglugerð um Brunamálaskólann og réttindi og skyldur slökkviliðsmanna segir svo í 8. grein:
III. KAFLI
Nám slökkviliðsmanna.
8. gr.
Þeir sem ráðnir eru til starfa sem slökkviliðsmenn skulu fullnægja eftirtöldum skilyrðum:
1. Hafa góða líkamsburði, vera andlega og líkamlega heilbrigðir, reglusamir og háttvísir, hafa góða sjón og heyrn, rétta litaskynjun og vera ekki haldnir lofthræðslu eða innilokunarkennd.
2. Hafa að lokinni reynsluráðningu aukin ökuréttindi til að stjórna: a) vörubifreið og b) leigubifreið.
3. Hafa iðnmenntun sem nýtist í starfi slökkviliðsmanna eða sambærilega menntun og reynslu.
Víkja má tímabundið frá einu eða fleiri skilyrðum í 1. mgr. vegna þeirra sem gegna slökkvistarfi eða starfa við brunavarnir samkvæmt 2. tölul. 1. gr. reynist ekki unnt að fá menn til starfa sem uppfylla framangreind skilyrði.
Endurráðning í starf slökkviliðsmanna miðast við það að þeir standist þær kröfur sem fram koma í þessum kafla.
Meirihluti starfsmanna liðsins hefur menntun til að sinna bæði slökkvistörfum og sjúkraflutningum. Menntun til slökkvistarfa. Menntun starfsmanna til slökkvistarfa er bundin í reglugerð og er sem hér segir:
Fornám
Nám sem nýliði verður að taka áður en hann hefur byrjar á vakt hjá slökkviliðinu. Skyldunám að lágmarki 80 kennslustundir.
Atvinnuslökkviliðsmaður
Nám sem slökkviliðsmaður má hefja eftir sex mánuði í starfi. Skyldunám sem er 540 kennslustundur, en hefur nú verið skipt í tvennt. Umsjón námskeiðsins er í höndum Slökkviliðs höfuðborgarsvæðisins, Akureyrar og Brunavarna Suðurnesja.
Eldvarnaeftirlit
Nám fyrir þá sem starfa við eldvarnaeftirlit. Ekki skyldunám nema fyrir þá sem sækjast eftir því að starfa við eldvarnaeftirlit.
Ennfremur er slökkviliðsmönnum boðið upp á meiri menntun með eftirfarandi námskeiðum:
Landflokkur
Menntun í björgun mannslífa utan alfaraleiða.
Stjórnunarnámskeið
Menntun fyrir aðal-, varð- og aðstoðarvarðstjóra í stjórnun á vettvangi.
Vettvangsstjóri
Námskeið sem veitir réttindi til starfa sem vettvangsstjóri í almannavarnaskipulagi. Námstími fimm dagar.
Menntun til sjúkraflutninga.
Allir sjúkraflutningamenn liðsins taka grunnnámskeið í sjúkraflutningum. Um er að ræða skyldunám sem tekur 15 daga. Sjúkraflutningamönnum stendur auk þess til boða fjöldi námskeiða, til dæmis neyðarflutningsnám sem tekur 210 daga og samanstendur af 25 daga bóklegu námi og starfsþjálfun á sjúkrahúsi í fimm daga, auk 180 daga starfsþjálfunar á neyðarbíl. Námskeiðið er haldið á vegum Sjúkraflutningaskólans. Sjá www.ems.is
Þá býðst neyðarflutningsmönnum að sækja starfsnám erlendis, svonefnt paramedic-nám hjá Center for Emergency Medicine í Pittsburgh. Námið tekur eitt ár eða þrjár annir. Sjö starfsmenn hafa lokið þessu námi og í ágúst 2001 ljúka fjórir starfsmenn til viðbótar náminu í Pittsburgh. Nánari upplýsingar um þetta nám er að finna á www.pitt.edu