Mýflug

Sjúkraflug

Mýflug sinnir nær öllu sjúkraflugi innan Íslands samkvæmt samningi við Heilbrigðisráðuneytið, og hefur verið samningur í gildi milli þessara aðila frá árinu 2006.

Miðstöð sjúkraflugsins er á Akureyri og starfar Mýflug ásamt Slökkviliði Akureyrar og Sjúkrahúsinu á Akureyri að því.

Sé óskað eftir sjúkraflugi vinsamlegast hafið samband við 112.

(Skriflegar sjúkraflugsbeiðnir má nálgast hér)

Á Akureyrarflugvelli er staðsett sérútbúin sjúkraflugvél af gerðinni Beechcraft B200 Super King Air sem ávallt er reiðubúin til flugs, á öllum tímum sólarhringsins, allt árið um kring. Einnig hefur Mýflug til umráða aðra samskonar sjúkraflugvél þannig að í neyðartilfellum er hægt að kalla út aðra flugvél. 

Flugvélin er búin jafnþrýstibúnaði, sem gerir henni kleift að fljúga ofar flestum veðrum, hefur mjög góða flugdrægni og getur hún jafnframt notast við stuttar flugbrautir, líkt og víða eru á Íslandi og Grænlandi.

Í áhöfn flugvélarinnar eru flugstjóri, flugmaður og sjúkraflutningamaður/bráðatæknir. Þegar þörf krefur fylgir einnig læknir frá SAk sjúklingum.

Um borð er pláss fyrir tvo sjúklinga á börum og allur nauðsynlegur búnaður til umönnunar þeirra alltaf til staðar. Sérstakar ráðstafanir eru gerðar þegar flogið er með þungaðar konur og börn.

TF-MYA sjúkraflugvél Mýflugs 

Síðustu ár hefur sjúkraflugum farið fjölgandi og árið 2017 var metár en þá voru farin 799 sjúkraflug með yfir 800 sjúklinga. Ásamt því sinnir Mýflug sjúkraflugi á milli landa, einkum frá Grænlandi, en einnig er mögulegt að fljúga í beinu flugi (án millilendinga) til áfangastaða á Norðurlöndunum og Bretlandseyjum.

 Vakni einhverjar spurningar má hafa samband við:

  • Flugfélagið Mýflug: 464-4400 - (Hafa samband)
  • Slökkvilið Akureyrar: 461-4200